கல்முனை அஷ்ரப் ஞாபகார்த்த வைத்தியசாலையில் 70 வயது மூதாட்டிக்கு சத்திரசிகிச்சை மூலம் வயிற்றுக்கட்டி அகற்றம்

கல்முனை அஷ்ரப் ஞாபகார்த்த வைத்தியசாலையின் சத்திரசிகிச்சைக் குழுவினர் 70 வயது மூதாட்டி ஒருவருக்கு சிக்கலான சத்திரசிகிச்சை மூலம் சமிபாட்டுத் தொகுதியை மீளமைத்து, கட்டியை வெற்றிகரமாக அகற்றியுள்ளனர்.
வயிற்றுக்கட்டி காரணமாக சிறுகுடலுக்கு உணவு செல்வதைத் தடுத்ததால், உணவு உட்கொள்வதில் நீண்டகாலமாக சிரமப்பட்டு வந்த நோயாளிக்கு இந்த சத்திரசிகிச்சை மேற்கொள்ளப்பட்டது.
சிரேஷ்ட சத்திரசிகிச்சை நிபுணர் டாக்டர் ஏ.டபிள்யூ.எம். சமீம் தலைமையிலான குழுவினர் நான்கு மணித்தியாலங்களுக்கும் மேலாக சப் டோட்டல் கெஸ்ட்ரோஸ்டமி (Subtotal Gastrostomy) சத்திரசிகிச்சையை கெஸ்ட்ரோஜெஜுனோஸ்டமி (Gastrojejunostomy) உடன் மேற்கொண்டனர். இந்த சத்திரசிகிச்சையின் மூலம் வயிற்றின் பாதிக்கப்பட்ட பகுதி அகற்றப்பட்டு, எஞ்சிய பகுதி சிறுகுடலுடன் இணைக்கப்பட்டது.
அம்பாறை மாவட்ட அரச வைத்தியசாலையில் இலவசமாக மேற்கொள்ளப்பட்ட இந்த சத்திரசிகிச்சையைத் தொடர்ந்து நோயாளி வெற்றிகரமாக குணமடைந்துள்ளார்.