தரமற்ற இறக்குமதிப் பொருட்கள் விடுவிக்கப்பட மாட்டாது – அமைச்சரவைப் பேச்சாளர் நளிந்த ஜயதிஸ்ஸ

பொதுச் சுகாதாரம் மற்றும் உணவுப் பாதுகாப்பை உறுதிப்படுத்தும் நோக்கில், தேவையான தரங்களை அடையாத எந்தவொரு இறக்குமதிப் பொருட்களோ அல்லது உணவுப் பொருட்களோ விடுவிக்கப்பட மாட்டாது என அமைச்சரவைப் பேச்சாளரும் அமைச்சருமான கலாநிதி நளிந்த ஜயதிஸ்ஸ நவம்பர் 17 அன்று தெரிவித்தார்.
சுகாதார அமைச்சு அல்லது இலங்கை தர நிர்ணய நிறுவனத்தின் அங்கீகாரத்தைப் பெறாத பொருட்கள் சுங்கத்தால் தடுத்து வைக்கப்பட்டுள்ளதாகவும், தரமற்ற 120 கொள்கலன்கள் தொடர்பான அறிக்கைகள் சமர்ப்பிக்கப்படலாம் என்றும் அவர் குறிப்பிட்டார்.
உலர்ந்த மிளகாய் விலை உயர்வு குறித்து இறக்குமதியாளர்கள் கவலை தெரிவித்த போதிலும், தரமற்ற பொருட்கள் விடுவிக்கப்பட மாட்டாது என்று ஜயதிஸ்ஸ மேலும் தெரிவித்தார். உள்ளூர் விவசாயிகளைப் பாதுகாக்க அரசாங்கம் முயல்வதாகவும், நுகர்வோர் விவகார அதிகார சபை வழக்கமான நுகர்வோர் பாதுகாப்புச் சோதனைகளை நடத்துவதாகவும் அவர் குறிப்பிட்டார்.