முதிர்ச்சியற்ற சிசுக்களின் சுகாதாரப் பாதுகாப்பினை உறுதிப்படுத்த விசேட வழிகாட்டல்கள் அறிமுகம்

முதிர்ச்சியற்ற சிசுக்களின் சுகாதாரப் பாதுகாப்பினையும் எதிர்கால அபிவிருத்தியினையும் உறுதிப்படுத்தும் விசேட வழிகாட்டல்கள், நவம்பர் 15ஆம் திகதி உலக முதிர்ச்சியற்ற சிசுக்கள் தினத்தை முன்னிட்டு அறிமுகப்படுத்தப்பட்டுள்ளன.
இவ்வழிகாட்டல்கள், இலங்கை மகப்பேற்றுச் சங்கத்தினால் ஏற்பாடு செய்யப்பட்டிருந்த நிகழ்வில், சுகாதார பிரதி அமைச்சர் டொக்டர் ஹன்சக விஜேமுனி தலைமையில் அறிமுகப்படுத்தப்பட்டன.
நிகழ்வில் உரையாற்றிய டொக்டர் விஜேமுனி, சிசுக்கள் பிறந்த பின்னரான தீவிர சிகிச்சைப் பிரிவுகளிலிருந்து வெளியேறிய பின்னரும், சுகாதார சேவைகள் தொடர்ச்சியான பின்தொடர் சிகிச்சைகளை வழங்க வேண்டும் எனக் குறிப்பிட்டார். போதிய பராமரிப்பு இல்லாவிட்டால், வளர்ச்சி, பார்வை மற்றும் சுவாசப் பிரச்சினைகள் ஏற்படும் அபாயம் உள்ளதாகவும் அவர் எச்சரித்தார்.
முதிர்ச்சியற்ற சிசுக்களைப் பாதுகாப்பதற்கு அரச சுகாதார சேவை, தொழில்சார் சங்கங்கள், தனியார் துறை மற்றும் அனுசரணையாளர்கள் ஆகியோரிடையே கூட்டு ஒத்துழைப்பு அவசியம் என்றும் டொக்டர் விஜேமுனி மேலும் தெரிவித்தார்.