போதைப்பொருட்களுக்கு எதிராக நாடு தழுவிய தீர்க்கமான முயற்சிக்கு நரேந்திர மோடி அழைப்பு
போதைப்பொருள் அச்சுறுத்தலை ஒழிப்பதற்கும் இளைஞர்களைப் பாதுகாப்பதற்கும் நாடு தழுவிய தீர்க்கமான முயற்சிக்கு இந்தியப் பிரதமர் நரேந்திர மோடி புதன்கிழமை (18) நடைபெற்ற மத்திய அமைச்சரவைக் கூட்டத்தில் அழைப்பு விடுத்தார்.
நக்சலிசத்திற்கு எதிரான அரசாங்கத்தின் முயற்சிகளுடன் ஒப்பிட்டுப் பேசிய மோடி, போதைப்பொருட்களையும் இதேபோல் ஒழிக்க முடியும் என்று கூறினார். அதேவேளை, நக்சலிசம் மீண்டும் தலைதூக்க அனுமதிக்க வேண்டாம் என்றும் அதிகாரிகளை எச்சரித்தார்.
வறுமை ஒழிப்பு குறித்தும் மோடி பேசினார். 11 அமைச்சகங்களால் சமர்ப்பிக்கப்பட்ட உலக வங்கி அறிக்கையின்படி சுமார் 50 கோடி மக்கள் வறுமையிலிருந்து வெளியேறியுள்ளதாக அவர் குறிப்பிட்டார்.
இந்தக் குடிமக்கள் மீண்டும் வறுமைக்குள் தள்ளப்படுவதைத் தடுப்பதன் அவசியத்தை அவர் வலியுறுத்தினார். அவர்களின் நிதி எதிர்காலத்தைப் பாதுகாக்க சேமிப்பு கலாச்சாரத்தை ஊக்குவிக்குமாறும் அவர் கேட்டுக்கொண்டார்.