දෙවිනුවර ශ්රී විෂ්ණු මහා දේවාලයේ වැඩබලන බස්නායක නිලමේ ලෙස සම්පත් කිරිගේ පත්කෙරේ

ඓතිහාසික දෙවිනුවර (දොන්ද්රා) උපුල්වන් ශ්රී විෂ්ණු මහා දේවාලයේ වැඩබලන බස්නායක නිලමේ ලෙස සම්පත් කිරිගේ මහතා තෙමසක කාලයකට පත්කර තිබේ.
මෙම පත්වීම සිදුකර ඇත්තේ හිටපු බස්නායක නිලමේ තිළිණ මධුසංක මහතාගේ ධුර කාලය නොවැම්බර් 15 වැනිදායින් අවසන් වීමෙන් අනතුරුවය. තෙමසක කාලයකට පසුව ස්ථිර බස්නායක නිලමේවරයකු පත්කර ගැනීම සඳහා බුද්ධශාසන කොමසාරිස්වරයා විසින් මැතිවරණයක් පැවැත්වීමට නියමිතය.
මාතර, කඹුරුපිටියේ උපත ලැබූ කිරිගේ මහතා ගාල්ල ශාන්ත ඇලෝසියස් විද්යාලයෙන් සහ ගල්කිස්ස ශාන්ත තෝමස් විද්යාලයෙන් අධ්යාපනය ලබා ඇත. ඔහුට ගුවන් සේවා කළමනාකරණ අත්දැකීම් දශක දෙකකට ආසන්න වන අතර, හිටපු ජාතික මට්ටමේ පැසිපන්දු ක්රීඩකයෙකි.