2027 வரவுசெலவுத் திட்டத்தில் பொதுச் சுகாதார பரிசோதகர்களின் சேவை மற்றும் கொடுப்பனவுகள் புறக்கணிப்பு – சங்கம் குற்றச்சாட்டு

சுகாதார மற்றும் உள்ளூராட்சித் திணைக்களங்களின் கீழ் நாடு முழுவதும் சேவையாற்றும் சுமார் 2,400 பொதுச் சுகாதார பரிசோதகர்கள், ஜனாதிபதியால் முன்வைக்கப்பட்ட 2027 வரவுசெலவுத் திட்ட முன்மொழிவுகளில் முழுமையாகப் புறக்கணிக்கப்பட்டுள்ளதாக இலங்கை பொதுச் சுகாதார பரிசோதகர்கள் சங்கம் தெரிவித்துள்ளது.
ஒற்றை கிராம உத்தியோகத்தர் பிரிவுகளில் சேவையாற்றும் கள உத்தியோகத்தர்களுக்கான அலுவலகக் கொடுப்பனவுகள் அதிகரிக்கப்பட்டுள்ள நிலையில், 10 முதல் 20 பிரிவுகளை உள்ளடக்கிய பரிசோதகர்களுக்கு அலுவலகக் கொடுப்பனவுகளில் எந்தவித மாற்றமும் செய்யப்படவில்லை என சங்கம் சுட்டிக்காட்டியுள்ளது.
மேலும், தினமும் சுமார் 100 கிலோமீற்றர் தூரம் பயணிக்கும் பரிசோதகர்களுக்கான பயணக் கொடுப்பனவுகள் கவனிக்கப்படவில்லை என்றும், தகுதியான உத்தியோகத்தர்களுக்கு மோட்டார் சைக்கிள்களை வழங்குவதற்கான எந்தவொரு திட்டமும் முன்மொழியப்படவில்லை என்றும் சங்கம் தெரிவித்துள்ளது. வரவுசெலவுத் திட்டத்தின் மூலம் தமது பிரச்சினைகளைத் தீர்க்குமாறு சங்கம் அரசாங்கத்தை வலியுறுத்தியுள்ளது.