அத்தியாவசிய உணவுப் பொருட்கள், மூலப்பொருட்கள் மற்றும் தனிநபர் வருமானத்திற்கான வரிக் குறைப்புக்களை வரவுசெலவுத் திட்டம் அறிமுகப்படுத்துகிறது

உணவுப் பொருட்களின் விலைகளைக் கட்டுப்படுத்த வரவுசெலவுத் திட்ட நடவடிக்கைகள் விசேட பண்ட வரியைத் திருத்தியுள்ளன. இறக்குமதி செய்யப்பட்ட கருவாடு மற்றும் மாசி மீன் மீதான வரிகள் ஒரு கிலோகிராமிற்கு ரூ. 10 ஆகவும், காய்ந்த மிளகாய் மீதான வரி ரூ. 50 ஆகவும் குறைக்கப்பட்டன. அதேவேளை, இறக்குமதி செய்யப்பட்ட சீனி மீதான வரி ரூ. 10 ஆல் அதிகரிக்கப்பட்டது.
செஸ் வரி 25 சதவீதம் குறைக்கப்பட்டதுடன், இறக்குமதி செய்யப்படும் பத்திரிகைகள் மீதான 10 சதவீத துறைமுகங்கள் மற்றும் விமான நிலையங்கள் அபிவிருத்தி வரி 2027 ஜனவரி 1 ஆம் திகதி முதல் நீக்கப்படும். சுற்றுலா அபிவிருத்தி வரியும் முழுமையாக நீக்கப்பட்டது.
மூன்று மில்லியன் அமெரிக்க டொலருக்கும் அதிகமான முதலீட்டுச் சபை அங்கீகரிக்கப்பட்ட ஏற்றுமதி உற்பத்தி மற்றும் சுற்றுலாத் திட்டங்கள் 200 சதவீத மூலதனக் கொடுப்பனவைப் பெறும். அத்துடன், புதிய ஏற்றுமதியாளர்கள் ஆறு மாதங்களுக்குள் தகுதியான ஏற்றுமதியாளர்களாக அங்கீகரிக்கப்படுவார்கள்.
மாதாந்த தனிநபர் வருமான வரி விலக்கு வரம்பு ரூ. 162,500 ஆக உயர்த்தப்பட்டதுடன், அதிகபட்ச 36 சதவீத வரி விகித வரம்பு ரூ. 433,000 ஆக உயர்த்தப்பட்டது. புத்தகங்கள் மற்றும் அப்பியாசக் கொப்பிகள் மீதான பெறுமதி சேர் வரியும் முழுமையாக நீக்கப்பட்டது.