ජාතික පුස්තකාලයාධිපතිවරුන් 100කට අධික පිරිසකට පරිසර වැඩමුළුවක්

මධ්යම පරිසර අධිකාරිය (CEA) සහ ශ්රී ලංකා පුස්තකාල සංගමය එක්ව පරිසර හිතකාමී පුස්තකාල සේවා ප්රවර්ධනය කිරීමේ අරමුණින් නොවැම්බර් 18 වැනි දින බත්තරමුල්ලේ පිහිටි මධ්යම පරිසර අධිකාරියේ ශ්රවණාගාරයේදී වැඩමුළුවක් පවත්වන ලදී.
ජාතික පරිසර පනත, පරිසර සංරක්ෂණය සහ පරිසර කළමනාකරණය පිළිබඳව මහජනතාව දැනුවත් කිරීම සඳහා පුස්තකාල සේවා භාවිත කිරීම කෙරෙහි අවධානය යොමු කළ මෙම සැසියට දිවයින පුරා පුස්තකාලයාධිපතිවරුන් 100කට අධික පිරිසක් සහභාගී වූහ.
ඉන්දියාව වැනි අසල්වැසි රටවල් හා සසඳන විට ශ්රී ලංකාවේ තොරතුරු තාක්ෂණයේ ප්රායෝගික යෙදවීම සංවර්ධනය විය යුතු බව පෙන්වා දෙමින්, නවීන තාක්ෂණය ඔස්සේ පුස්තකාල සේවා ඩිජිටල්කරණය කිරීමේ අවශ්යතාව සාකච්ඡාවලදී අවධාරණය කෙරිණි.
වැඩමුළුවට වැඩබලන පරිසර අමාත්යාංශ ලේකම් එච්.එම්.බී.පී. හේරත් මහතා, මධ්යම පරිසර අධිකාරියේ සභාපති තිලක් හේවාවසම් මහතා, මධ්යම පරිසර අධිකාරියේ අධ්යක්ෂ ජනරාල් ආර්.එස්.පී. කපිල රාජපක්ෂ මහතා සහ ශ්රී ලංකා පුස්තකාල සංගමයේ සභාපති සුගත් ගුණතිලක මහතා ඇතුළු පිරිසක් සහභාගී වූහ.